Sa lugar na ito, na madalas ay nag-aamoy inidoro ang buong paligid, paulit-ulit na usapan ang ating pagmamadali dahil marahil tayo'y huli na.

Sa himpilang ito ng ating pagmamadali, nagtatalo tayo kung may katiyakang pag-urong o pagsulong sa ating pagsagwan; o kung umaahon tayo o dumadausdos sa ating paglalakbay.

Sa inumang ito, na walang tiyak na panangga sa biglaang bugso ng ulan, pinipilit nating i-ahon ang mga nalulunod na mga relasyon, hinihiling na may mamagitan sa magkabilang-panig ng ating pagdadalawang-isip.

Sa tahanang ito, nilulunod ng jukebox ang ating mga pangaral at parangal.

Sa bawat pagdating at pag-alis, nagsasara tayo ng mga bukas at nagbubukas tayo ng mga isasara.

madami-dami ding sumibol na talbos
sa mga tangkay ng bugambilya
na noong isang linggo
ay inakala kong tuluyan nang nagtampo
at nalanta nang lubos.
may bisa ang dasal
para sa halamang ito
na isa ding sukatan ng buhay
dito sa aming tahanan...

project 6, quezon city / 28 setyembre 2003

 

dinadaig ng kulimlim na suson ng ambon
ang pilit humahaginit na raya ng bukanliwayway...

tila giniginaw ang ilog...

 

binabalot natin ng labi
ang mga bote ng serbesa
kapag di sinusuwerte
sa pag-igib ng pag-ibig

 

idinuduyan ng mga bundok
and mga ulap na nakadantay
sa kanyang sinapupunan.

masinop na nakapila ang mga isla
patungong hilaga
pasan nila ang kanilang lawa, burol,
talampas, bundok, ilog
palayan, maisan, niyugan
at ang mga sambayanang
nag-aaruga sa kanila.

 

nasagap ko kamakailan lamang > ang balitang di mo yata isinusulat sa pahayagan > ikaw na naman daw ay aalis > at matatagalan ang iyong pagbabalik > ang iyong pupuntahang mga lugar ay malamig > hayaan mo at mag-iipon ako ng pabaong init

hindi siya kumain
katawa'y pagagandahin.
   sa susunod na buwan
   irarampa ang mga bagong disenyo
   ng damit na galing sa ibang bansa.  

hindi siya kumain
pera'y iipunin.
   sa isang linggo
   dadalawin
   ang asawang ipiniit
   sa pagsali sa rali.

hindi siya kumain
protesta sa rehimen.
   bukas,
   unang anibersaryo ng pagpaslang
   sa kasintahang ang mata'y dinukot
   ng mga di-kilalang unipormado
   sa ngalan ng demokrasya.

hindi siya kumain
wala siyang kakainin.
   araw-araw
   kulang pa sa pamilya
   para sa isang seremonya
   sa hapag-kainan ang kita.

hindi siya kumain
nakaamba ang gawain.
   sinaklaw
   ng taktikal na opensiba
   ang oras
   ng kaning mais at ginamos.

            helikopter.
'sandosenang helikopter and dumating
sa mga bayang nakalubog sa baha.
            lubog.
lubog na lubog
ang mga bayan sa baha.
            ibinaba.
ibinaba mula sa helikopter
ang mga bigas,
saku-sakong bigas.
            ipinagulong.
ipinagulong mula sa helikopter
and mga de-lata,
kartun-kartong de-lata.
            ipinakain.
maraming ipinakain
na kanin at de-lata.
            binusog.

"... i do declare there were times that i was so
  lonesome and i took some comfort there..." -- the boxer

sa lilim ng punong nasa tabi ng kalye
may nakatayong disenteng babae
pakaway-kaway, ngingiti-ngiti
nag-aalala't may kalaliman na ang gabi
   dalawa daw niyang kapatid ay pinapag-aral
   dahil nasisante ang kanyang tatay
biglang nagkargasilya ang isang magarang lancer
bumukas ang bintana, dumungaw ang kustomer
kaagad niya itong nilapitan
gimik ng patron ay inalam
agad nagkasundo, konti lang ang usapan
   kailangan daw niya'y pauna sa ospital
   upang maipasok ang may sakit niyang nanay
sampung lilimampuin ang nasalok